Националниот натпревар „Европски квиз на пари” се одржа на 1 април 2025 година, онлајн, преку апликацијата Kahoot, под мотото: „Размисли пред да „заследиш”, за безбедност на твоите пари во иднина”. На истиот, учество земаа над 1.000 ученици од основните и средните училишта во Република Северна Македонија.
СОУ Гимназија „Добри Даскалов” – Кавадарци зема учество со 19 тимови или вкупно 38 ученици, со 3 наставници-ментори: Лоска Давчева, Благородна Лазова и Јасминка Ризова. Координатори на натпреварот „Европски квиз на пари” при Гимназијата се Лоска Давчева, професор по економски предмети и Благородна Лазова, професор по информатика.
Финансиската писменост е неопходна за секој поединец, за истиот да си го олесни животот и побрзо да напредува на секое поле. Во таа насока, седма година по ред, Македонската Банкарска Асоцијација во соработка со Народна банка на Република Северна Македонија и Комисијата за хартии од вредност, го организира Националниот натпревар „Европски квиз на пари”, на кој право на учество имаат ученици на возраст од 13 години до 15 години. Младите се иднината на една земја, парите се неизоставен дел од животот, па затоа неопходно е да се инвестира во финансиска писменост на младите!
Врската помеѓу образованието и финансиите е нераскинлива и правопропорционална, а тоа значи дека оној кој сега вложува повеќе во своето знаење и образование, се очекува во иднина да биде и побогат!
Затоа, драги ученици, инвестирајте во вашето знаење и користете ги парите паметно!
Текстот го напиша,
Лоска Давчева, професор по економски предмети