Проектите, иновативноста и креативноста се постојан дел од работата на СОУ Гимназија „Добри Даскалов“. Секоја генерација ученици носи таленти од различни области, кои со помош на нивните ментори излегуваат пред очите на јавноста. На нивните успеси горди се професорите, учениците и родителите.
На 25 и 26 ноември во Скопје се одржа натпреварот „Ноември-месец на науката“.Ученици од нашето училиште со своите ментори, професорите по биологија и хемија , Елизабета Иговска, Богде Коцева, Магдалена Убавкова и Даница Пецова зедоа учество и се вратија со награди и признанија. Во просториите на хемискиот факултет младите гимназијалци активно се вклучија во сите активности и покажаа најдобри резултати.
Преку иновативен пристап на полето на науката, учениците изработија модели, збирки и изведуваа експерименти и демонстрации. Предизвикаа исклучително внимание помеѓу натпреварувачите и стручната комисија.
Ученикот од прва година, Слободан Јовановиќ го освои првото место за проектот -биоразновидности и систематика на дневни пеперутки и молци, исклучителна збирка од пеперутки со претставници од четири континенти.Ученикот се претстави со микроскопски препарати и слики. Ученичката од трета година, Павлинка Ташева, учествуваше со модел – скелет на човек, изработка од хартија. За своето дело доби позитивни критики и сертификат.
Учениците од прва година, Софија Секуловска и Рената Попова освоија прво место за изведување на експериментот-каталитичко разложување на водороден пероксид ( хемиски дух од ламба).Учениците од трета година, Ѓорѓи Ристов и Лука Ристов добија сертификат за експериментот димна бомба.
Младите гимназијалци покажаа дека имаат натпреварувачки дух, дека имаат голем истражувачки потенцијал на полето на науката и желба за уште поголеми успеси во иднина. СОУ Гимназија„Добри Даскалов“ е училиште кое секогаш ги поддржува креативноста, работливоста, знаењето и успесите на своите ученици.Честитки до наградените ученици и нивните ментори.
