Гимназијата повторно се вклучи во проектот на Суперучилишта со што наши ученици оваа учебна година ќе имаат можност да учествуваат на размена со нивните врсници од Западен Балкан.
Размената помеѓу Средното училиште за современа уметност Тузла (Босна и Херцеговина) и Средното училиште Гимназија „Добри Даскалов“ во Кавадарци е насловена „Замисли сега – Создај утре“. Проектот го истражува идентитетот на младите, нивната поврзаност со Западен Балкан и нивната улога во обликувањето на иднината. Користејќи применети методи на театар и драма, учениците ќе се вклучат во креативни активности што поттикнуваат меѓукултурен дијалог, градење мир и соработка.
Учесниците ќе размислуваат за личните искуства за да изградат емпатија, разбирање и комуникација низ културните и историските разлики. Крајниот резултат ќе биде театарска претстава создадена од учениците, која ќе ги изрази нивните ставови, идентитети и аспирации.