Ораторство „Сите лица на животот“
Објавено на: 31.10.2018
По повод 25 Октомври – Европски ден на граѓанската правда, учениците од Гимназија „Добри Даскалов“ подготвија програма со наслов „Сите лица на животот“, во чест на починатата професорка по правни предмети Пандорка Јосифова од нашето училиште.
„Да се сака светот и животот, да се сака и покрај страдањата, со благодарност да се прифати секој сончев зрак и дури и во болката да не се заборави на насмевката – тој принцип никогаш нема да застари и денес е повеќе од кога и да е потребен и добредојден“- со овие зборови учениците им се обратија на присутните професори и гости.
Ораторите говореа за сите лица на животот: детство, безгрижност, пријателство, хуманост, трудољубивост, алтруизам, знаење, љубов, професионалност, добрина, среќа, тага, борба…Говореа за жената, нејзината сила и кршливост, говореа за нејзините права. Преку моќта на зборот ги потсетија присутните дека најважно во животот на човекот е семејството и љубовта во него.
Говореа за амбициите и соништата: „Вие сте родени со потенцијал. Вие сте родени со добрина и доверба. Вие сте родени со идеи и соништа. Вие сте родени со величественост. Вие сте родени со крилја. Не сте замислени да лазите, па затоа немојте. Вие имате крилја. Научете ги да ги користите и летајте“.
Авторските текстови на учениците беа проткаени со моќни мисли и стихови од светската литературна ризница.
„Храброста не е секогаш татнеж. Храброста понекогаш е тивкиот глас кој на крајот од денот шепоти: „Ќе се обидам повторно утре“.
Младите оратори ја сфатија магијата на зборот :„Подигни ги твоите зборови, а не твојот глас. Дождот е тој што прави цвеќињата да растат, а не грмотевиците“.
На крајот наместо поздрав просторијата ја исполнија зборовите: „Животот никогаш не смее да биде слава само на живите, зашто и мртвите некогаш биле живи, зашто и живите еднаш ќе бидат мртви и голем грев е нивната врска да се прекине. Смртта е врата,исто како и љубовта. Во иста вселена сме, во иста куќа, само поминуваме од една одаја во друга“.
Во проектот учествуваа ученици од втора, трета и четврта година: Драган Андреев, Ѓорѓи Стојанов, Стефан Попов, Ѓорѓи Ристов, Кристина Костадинова, Марија Глигорова, Андонија Тодорова, Владанка Аврамова, Стефанија Тодорова, Смиља Бошкова, Ана Новеска, Слободан Јовановиќ, Бранкица Несторовска, Елена Павлова и Душица Колева. Учениците работеа под менторство на професорите Душанка Иванова и Васка Петкова. Младите гимназијалци кои ги видовме во улога на оратори покажаа достоинство, знаење, почит и желба секоја година во училиштето да се одржува ораторство во кое ќе ги покажат своите говорни вештини.
Плакат линк
