Посета на Музејот на вкусовите и мирисите во Кавадарци

Објавено на: 28.11.2017

Учениците од средното училиште СОУ Гимназија „Добри Даскалов“- Кавадарци од паралелките III 6 и III 7, економско – правна и трговска струка, кои ги изучуваат предметите Економска Географија од проф. Фердинанд Чејков и Економија од проф. м- р Жанета Делова имаа можност да го посетат Музејот на вкусовите и мирисите во Кавадарци.

Овој Музеј на вкусовите и мирисите претставува посебна атракција во градот и е единствен Музеј од ваков вид во регионот. Во него има изложено 500 експонати, садови и алат кој се користел за подготовка на храната и виното во регионот од неолитот до денес.

Со почетоците на винарската визба „Тиквеш“ кон крајот на 19 век се поврзани повеќе угледни семејства од Тиквешијата кои започнувале да создаваат вински подруми во кои се произведуваат квалитетни вина во шишиња на чии етикети јасно се истакнува географското потекло на виното.  Периодот кореспондира со падот на Отоманската Империја. Пане Велков, трговец, аристократ и земјопоседник, отворил винарска визба на површина од 1200 квадратни метри. Првото споменување на „Тиквеш“ во пишан документ се поврзува токму со овој период, поточно со годината 1885, која се смета и за година кога за прв пат започнува организираното производство и продажба на вино во Македонија.

Како се зголемувала потрошувачката на вино, тие се здружувале и со други фамилии. Во Музејот постојат многу експонати кои служеле за производство на вино од кои еден е и муљачот кој е поклонет од фамилија Гркови од с. Ваташа. За употреба на муљачот биле потребни двајца луѓе, при обработката на грозјето.

Она што е важно овде да се спомне се однесува на првата винарска визба формирана од фамилија Велкови, што значи дека уште во тој дамнешен период било развиено стопанството и трговијата.