Работилница од Еразмус+ проектот RAINBOW во Ботошани, Романија
Објавено на: 19.12.2017
Во периодот од 11.12.2017 до 15.12.2017 г. професори и ученици од СОУ Гимназија „Добри Даскалов“ Кавадарци учествуваа на работилница во Романија во рамките на Еразмус+ проектот RAINBOW – Right Attitude IN Building Our World. Работилницата се одржа во Средното педагошко училиште Nicolae Iorga, во Ботошани, Романија и на неа учествуваа професори и ученици од училиштата партнери од Македонија, Романија, Италија, Турција, Шпанија, Литванија и Бугарија. Работилницата беше на тема планетата Земја. На неа учествуваа Христинка Косовска, проф. по латински јазик, Наде Сирмевска, проф. по математика и ученичките Анастасија Костова и Павлинка Ташева.
Свечен прием на учесниците и почетокот на работилницата се одржа во Историскиот музеј на град Ботошани каде пригоден говор одржаа училишниот инспектор Mighiu Rodica и директорката на училиштетот домаќин Mirela-Ofelia Sănduleanu.
Во рамките на работилницата учесниците имаа можност пред другите да се претстават себеси, училиштето и земјата од каде доаѓаат, да се запознаат со образовниот систем на училиштето домаќин и неговите простории и наставни средства. Во текот на работилницата учениците учествуваа во активности од областа на науката, уметноста, литературата, географијата, историја и резултатите од нивните активности беа презентирани последниот ден од работилницата. Професорите учествуваа на работилници за проектирање и имплементирање на воннаставни активности од областите од проектот, како и за дизајнирање на активности на меѓународните клубови во кои ќе учествуваат учениците од училиштата партнери во проектот RAINBOW.
Дел од програмата на работилницата беа и две научни екскурзии. На научната екскурзија „Земја – литература, наука, цивилизација“ учесниците на работилницата имаа можност да посетат две лаборатории на Факултетот за физика на Универзитетот Alexandru Ioan Cuza во Јаши, Романија каде присуствува на две предавања, како и на предавање за планетите и Сончевиот систем во Планетариумот на истиот Универзитет. На предавањата во лабораториите на Факултетот за физика учесниците беа запознати со користењето на ласерската технологија во разновидни случаи, науки и индустрии, како и присуствуваа на демонстрирање на работата на ласер, а на другото предавања беа запознати со претворањето на топлинската енергија во механичка, а потоа механичката во електрична, за што видоа опити од неколку примери на примена. Потоа ги посетија и музеите во Палатата на културата во Јаши – Музеј на уметноста и Музеј на науките Ștefan Procopiu, како и Националната Романска опера и Националниот театар во Јаши.
Во рамките на научната екскурзија „Земја – историја, географија, популарна уметност и наука“ учесниците ги посетија музеите во Тврдината на Стефан III Молдавски (Великиот), етно-музејот Село Буковина (во Сучеава) и Музејот на украсување и сликање на јајца во Вама, Буковина, музеј со извонредна колекција од разновидни традиции и култури. За време на оваа научна екскурзија учесниците имаа можност да ја разгледаат природата на планината Ciumarna на надморска височина од 1520 m.
Учесниците на работилницата се здобија со сертификати за успешно завршување на обуката.
