Транснационална средба од Еразмус+ проектот RAINBOW во СОУ Гимназија „Добри Даскалов“

Објавено на: 30.10.2018

Во СОУ Гимназија „Добри Даскалов“ Кавадарци се одржа транснационална средба од Еразмус+ проектот RAINBOW – Right Attitude In Building Our World во периодот од 25.10.2018 до 27.10.2018 г. На неа од учествуваа професори oд нашето училиште заедно со професори од партнерските училишта во проектот од Романија, Турција, Шпанија, Литванија, Бугарија и Италија.

На самиот почеток на средбата учесниците беа пречекани во училиштето – домаќин и на свечениот прием беа поздравени од Директорката на училиштето г-ѓа Невенка Поп-Ангелова. Директорката на училиштето воедно ги запозна учесниците со образовниот процес во училиштето, како и со историјата на истото. Во продолжение беа претставени активностите што следат во рамките на средбата.

За време на средбата учесниците дискутираа за активностите во следните работилници во Литванија и Бугарија. Потоа учесниците дискутираа за интернет страницата на проектот и ги прикачија сите материјали коишто се изработени во изминатиот период.

За време на вториот ден од работната средба имаше дискусија за имплементацијата и евалуацијата на проектот. Тимовите работеа на планирање на активностите од проектот и нивна евалуација до 2019 година. Исто така се разговараше за Европас сертификат за мобилност, како и за неформалните активности во имплементацијата на проектот. Учесниците на проектот се запознаа со условите и начинот на предавање во нашето училиште и меѓусебно разменија искуства и примери на добра пракса.

Во рамките на средбата се одржа и научна посета на Музејот на град Кавадарци, Националниот парк Галичица, манастирот на Св. Наум, Музејот на Заливот на коските и Охрид. На научната посета се одржа работилница во која се разговараше за неформални дидактички приоди и методи, поврзувајќи ја водата со начините на живеење во неолитот, разновидната флора и фауна, како и за културата, традицијата и религијата во регионот.