Во рамките на соработката на нашата гимназија со гимназијата Курт Николин од Шведска, оваа учебна година нашиот ученик Ристе Мицев го продолжи своето образование во Финспанг – Шведска. Нашето училиште до сега има изработено повеќе проекти во соработка со шведското училиште, со што наши ученици престојуваа во Шведска, и обратно, ученици од Шведска работеа на проекти со нашите гимназијалци во нашиот град.
Соработката во овој период продолжува и со реализацијата на проектот iOERc – Интегрирање на електронското учење во училниците” (Integrating E-Learning and Open Educational Resources into Classroom“- iOERc) кој што го реализира Гимназија „Добри Даскалов“ со уште пет партнери од Македонија, Бугарија и Шведска.
Покрај сите овие активности, по покана на проф. по информатика м-р Зоран Милевски, на 1 декември 2016 година (четврток) за време на часовите по програмски јазици за III година – ПМА подрачје, ученикот Ристе Мицев реализираше посета за време на часот и ги сподели своите досегашни искуства и начин на работа во училиштето во Шведска. Учениците за време на часот по програмски јазици имаа можност да направат утврдување на материјалот кој што го изучуваат и да се запознаат со практичните задачи кои што Ристе ги изработува во новата средина.
Ристе презентираше за програмирањето на CNC машините кои што ги користат во наставата и начинот на изработка на проекти во 3Д кои потоа се печатат на 3Д принтери.
Ваквиот пристап и презентација пред учениците се покажа како интересна идеја, се реализираа уште два часови коишто беа многу продуктивни. Покрај тоа што слушателите ги збогатија своите знаења за тоа која е примената на програмирањето, за наставната единица која што ја изучуваат по предметот програмски јазици, тие ја искористија оваа прилика и да го запрашаат гостинот за тоа какви се резултатите од големиот акцент кој што се однесува на тимска работа и изработка на заеднички задачи. Резултатот е секогаш поголем кога учениците соработуваат и на тој начин добиваат уште поголема мотивација за усовршување на своите вештини во областа на информатиката.
Дополнителни предлози и комуникација ќе се извршува на системот за е-учење Moodle.
