Продолжува реализацијата на Еразмус+ проектот DIGITeachEUrope во Сплит, Хрватска
Објавено на: 12.03.2018
Во периодот од 1 до 7 март 2018 год. се реализираше втората Еразмус+ работилница во Сплит, Хрватска со партнерите на нашето училиште од Хрватска, Германија и Полска, а во рамките на проектот DIGITeachEUrope – Developing digital learning environments for schools in Europe. На оваа работилница од нашето училиште присуствуваа Христинка Косовска, проф. по латински јазик и м-р Зоран Милевски – проф. по информатика.
Тема на II работилница од Еразмус+ проектот DIGITe@chEUrope беше Идентификација и развој на надарени ученици.
Од 1 до 3 март учесниците присуствуваа на Конференцијата „Предизвици во работата со надарени ученици“ организирана од Центарот на извонредност од Сплитско-Далматинскиот округ на која имаше предавачи од Хрватска и Израел.
На Конференцијата се стави акцент на препознавањето на надарени ученици и градењето средини за поттикнување на развој на надареноста, карактеристиките на нивниот психолошки развој, предизвикот и важноста на мотивирање на надарените ученици, препораките за наставни форми и стратегии, облици на воспитно-образовна подршка на надарени ученици, примери и предлози за во иднина.
Покрај учеството на Конференцијата во рамките на II работилница од проектот се одржа дискусија на кружна маса на која се дискутираше за евалуација на Конференцијата, размена на искуства од училиштата со дигитални методи, за нови идеи, апликации и наставни методи, како и евалуација на досегашната работа. Потоа учесниците присуствуваа на час за 3D моделирање и 3D принтање, го посетија Центарот за обука и образование на наставници во Електротехничкото училиште во Сплит каде се одржа работилница за Google Drive алатките. Учесниците во II работилница го посетија и Сплитско-Далматинскиот округ каде беа примени од претседателот на Управниот оддел за образование, култура, техничка култура и спорт.
